وهكذا أصبحت أديبا! ايه ده يا جدعان انا بقيت أديب !طبعا ما انا بقيت بكتب وهنا سيسأل سائل او صلب مش فارقة ما الناس كلها بتكتب ؟ وهنا ساضع الخطوط الفاصلة بين لاديب والناس اللى بتكتب. الاديب هو اللى بيكتب من دماغه اللى اتملت في بعض الاحيان هبل وعته وفي احيان اخرى ثقالة وسماجةمن ايه هو نفسه مش عارف ! اما الناس اللى بتكتب وخلاص فهي لا تختلف عن النقاش على الجدران وكل واحد وتخصصه (حتى راجع أعمدة الانارة وكراسي المواصلات وورق الامتحانات ان امكن) شفتوا بقى الفرق شاسع ازاى بين الكاتب والاديب .المهم نرجع لموضوعنا ازاى ممكن تبقى اديب زي مانا بقيت اديب اول حاجة لازم تعملها تكتب مقال تقول فيه ان انت بقيت اديب زى المقال دهوتكتب فيه أى حاجة ومش شرط تكون من دماغك وده مؤقتا بس اهم حاجة تقول ان انت أديب مش كاتب عشان مش تتفهم غلط تانى حاجة تعمل دفتر لكتاباتك الفريدة من نوعها واللى ممكن بعد كدة تنشرها في أي مكان ولو على حبال الغسيل المهم تنشف اقصد تتنشروممكن جدا كتاباتك ماتتقريش لانك أساساً مش هاتفكر تحطها في أي مكان غير صفيحة الزبالة لان ده موطنها الاصلى . تالت حاجة لازم تعملها الدعاية لكن ازاي؟

في عدة افكار مزهلة اولها انك تجيب واحد عبيط وتقوله دي قصة الكاتب الراحل.....وطبعا هو هايقرأها على سمعة الكاتب اللى هاتنهار في نظره من اول كلمة وممكن تطبعها على حسابك وتوزعها ببلاش وطبعا ما حدش هايخدها منك لان الناس هاتفتكرها منشورات . لكن معلش لازم تستحمل هو الاديب بيبقى أديب بالساهل طبعا لازم يدفع ثمن اللى هايعمله في الناس وكمان لازم تكون عارف ان سلم المجد ممكن يتكسر فوق دماغك قبل ما توصل ليه اصلا . معلش اعمل حاجة تانية ابعت كتاباتك في ايميلات للناس اللي تعرفهم بس لازم تكون عارف ان هم مش هايعرفوك بعد كده تانى ولذلك كانت هذه المحاولة الاخيرة لتصبح أديبا في نظر الناس ,لكن ماعلينا مش تبقى طماع ونزل طموحك حبتين وخليه انك تبقى أديب من وجهة نظرك بس وهنا فقط ستشعر بانتصارك لأنك بعد كل تلك المعاناة قد وصلت للهدف المنشود وهو ان تصبح اديب مثلى تماما.

3mor lover